سابق صدر جنرل (ر) پرویز مشرف کے ہم شکل اور ممکری آرٹسٹ اداکار وسیم انصاری انتقال کر گئے۔ مرحوم نے سابق صدر پرویز مشرف کی پیروڈی سے شہرت پائی تھی۔
اداکار وسیم انصاری کے بیٹے کاشان انصاری نے بتایا کہ والد کی نماز جنازہ گلستان جوہر میں رہائش گاہ کے قریب مریم مسجد نعمان گرینڈ سٹی میں بعد نماز مغرب ادا کی گئی جنھیں بعدازاں گلستان جوہر بلاک 19 میں واقع قبرستان میں سپرد خاک کر دیا گیا۔
انھوں نے بتایا کہ والد وسیم انصاری شوگر اور بلڈ پریشر کے مریض تھے جو یوٹیلٹی بل بھروانے گئے تھے کہ اچانک گر گئے اور انھیں فوری طور پر قریبی اسپتال لیجایا گیا جہاں وہ جانبر نہ ہو سکے۔
مرحوم اداکار وسیم انصاری نے سوگواران میں بیوہ ، بیٹا اور 4 بیٹیوں کو چھوڑا ہے ۔
