ایم کیو ایم پاکستان کے سینیئر ڈپٹی کنوینٹر مصطفیٰکمال نے کہا ہے کہ آئندہ الیکشن میں اپنی چھینی ہوئی نشستیں بھاری اکثریت سے جیت کر واپس لیں گے.
متحدہ قومی موومنٹ پاکستان بلدیہ ٹاؤن کے زیرِ اہتمام کارکنان کے جنرل ورکرز اجلاس سے نامزد امیدوار برائے حلقہ این اے 249 و سینئر ڈپٹی کنوینر سید مصطفیٰ کمال نے خطاب کرتے ہوئے کہا کہ بلدیہ ٹاؤن اپنے آپ میں پورا پاکستان ہے جہاں تمام زبانیں بولنے والے افراد رہتے ہیں۔
انہوں نے کہا کہ ہم پورے پاکستان کے مظلوموں کے ساتھ ہیں اور 98 فیصد غریب و متوسط طبقے کی واحد نمائندہ جماعت ہیں، ہم کراچی سے نکل کر دوسرے صوبوں میں ایم کیو ایم پاکستان کے امیدوار کھڑے کریں گے تو شکل پر نہیں نظریہ پر ووٹ ملیں گے۔
مصطفیٰ کمال نے کہا کہ ہم آپس میں متحد نہیں ہوئے تو ہمارے درمیان ظالم قوتیں گھس کر پھوٹ ڈال دیں گی، ہم نے حق و سچ کا ساتھ دینا ہے اور ظالم کو ظلم سے روکنا ہے۔
ان کا کہنا تھا کہ پاکستان کو 70 فیصد ریونیو کما کر دینے والے شہر کے ساتھ سوتیلی ماں جیسا سلوک کیا جارہا ہے،اس شہر کراچی کے عوام میں اتنی طاقت ہے کہ ایم کیو ایم کے پرچم تلے آگیا تو ہم یہاں سے بیٹھ کر پنجاب ، بلوچستان، خیبرپختونخواہ اور اسلام آباد کے فیصلے کریں گے۔
سید مصطفیٰ کمال نے کہا کہ بلدیہ ٹاؤن چاروں صوبوں کا مجموعہ ہے جو تمام لسانی اکائیوں کو یکجا کرتا ہے، آنے والا وقت انشاء اللہ کراچی کا ہے اور پورے پاکستان کے عوام اس تحریک میں شامل ہورہے ہیں آج کا اجلاس ہماری کامیابی کی پہلی سیڑھی ہے۔
انہوں نے کہا کہ پاکستان کی تاریخ میں بلدیہ ٹاؤن میں ہم نے 60لاکھ گیلن پانی کی لائن ڈال کر عوام کو پریشانی سے نجات دلائی، اسپورٹس کمپلیکس، سڑکوں کا جال اور جو بھی ممکن ہو سکا ایم کیو ایم نے عوام کے مسائل کو حل کرنے کی کوشش کی۔
سینیئر ڈپٹی کنوینر نے کہا کہ پیپلز پارٹی کی 15 سالہ بدترین کارکردگی اور متعصب حکومت کے بعد بلدیہ ٹاؤن کا نقشہ ہی تبدیل ہوگیا ہے لیکن ایم کیو ایم اس بلدیہ ٹاؤن کو دوبارہ ایسا ماڈل ٹاؤن بنائے گی جس کو پوری دنیا دیکھے گی۔
انہوں نے کہا کہ کراچی کے عوام کے پاس ایم کیو ایم کے علاوہ کوئی دوسرا آپشن نہیں ہے، عوام کے دکھ درد اور پریشانیوں میں ہمارے علاوہ کوئی اور سیاسی جماعت کھڑی نہیں ہوتی، یہاں سے جو لوگ جیت کر جائیں گے وہ اسلام آباد جا کر کراچی کے عوام کی ترجمانی اور حق کیلیے آواز بلند کریں گے۔
انہوں نے مزید کہا کہ ایم کیو ایم نے ابھی تک کراچی سے 5 حق پرست نمائندوں کے ناموں کا اعلان کردیا ہے جن میں بلدیہ ٹاؤن کے موجودہ حلقہ این اے 249 سے مجھے نامزد کیا گیا ہے۔ ہم انشاء اللہ ایک جان ہوکر دشمنوں کے مذموم عزائم کو خاک میں ملا دیں گے، اپنی چھینی ہوئی نشستوں کو بھاری اکثریت سے جیت کر واپس لیں گے۔
اس موقع پر ایم کیو ایم پاکستان کے ڈپٹی کنوینر انیس احمد قائم خانی، اراکین رابطہ کمیٹی، اراکین سی او سی، ایم کیو ایم میں شمولیت اختیار کرنے والے ن لیگ کے سینئر مقامی رہنما ملک نثار کے علاوہ ٹاؤن، یوسیز کے ذمہ داران اور کارکنان کی بڑی تعداد موجود تھی۔
