ماہرین صحت کہتے ہیں کہ اگر آپ دل کے امراض سے بچنا اور صحت مند رہنا چاہتے ہیں تو عمارت میں چڑھتے ہوئے لفٹ کے بجائے سیڑھیوں کا استعمال کریں۔
ماہرین کے مطابق ٹیکنالوجی کی ترقی نے انسانوں کے لیےبہت سے خطرات بھی پیدا کردیے ہیں جن میں صحت کے مسائل سرفہرست ہیں۔ سائنسی ایجادات کی بدولت انسان کی جسمانی سرگرمی روز بہ روز کم ہوتی جارہی ہے جس کی وجہ سے مختلف امراض میں مبتلا ہونے کی شرح بھی بڑھ رہی ہے۔
گذشتہ عشرے میں ہائپرٹینشن ( ہائی بلڈ پریشر)، ذیابیطس، موٹاپا اور دل کے امراض میں بے پناہ اضافہ ہوا ہے اور یہ امراض انسانی اموات کی سب سے بڑی وجہ بن کر سامنے آئے ہیں۔
متعدد تحقیقی مطالعات میں یہ بات سامنے آئی ہے کہ ہفتے میں کم از کم ڈھائی گھنٹے کی ہلکی پھلکی ورزش یا تیز قدمی( واک ) یا جوگنگ آپ کے دل کو صحت مند رکھتی ہے۔
اگر آپ مصروفیت کی وجہ سے ورزش کے لیے وقت نہیں نکال پاتے تو پھر ماہرین امراض دل نے اس کا آسان حل بتایا ہے کہ دفتر، شاپنگ مال یا کسی بھی عمارت میں جاتے ہوئے لفٹ کے بجائے سیڑھی کا استعمال کریں، اس سے کولیسٹرول کی سطح گرجاتی ہے اور بلڈ پریشر بھی کنٹرول میں رہے گا۔
