چنائی: ورلڈ کپ کے16 ویں میچ میں نیوزی لینڈ نے افغانستان کو 149 رنز سے شکست دے دی ۔ 289 رنز کے تعاقب میں افغانستان کی پوری ٹیم 35 ویں اوور میں 139 رنز بناکر آؤٹ ہوگئی ۔
بھارت کے شہر چنئی کے ایم اے چدمبرم ا سٹیڈیم میں ہونیوالے آئی سی سی ورلڈ کپ 16 ویں میچ میں افغانستان نے ٹاس جیت کر پہلے فیلڈنگ کا فیصلہ کیا، نیوزی لینڈ نے پہلے کھیلتے ہوئے مقررہ 50 اوورز میں 6 وکٹوں کے نقصان پر 288 رنز بنائے۔ڈیون کانوے 20 رنز بناکر آؤٹ جبکہ ول ینگ نے 54 رنز کی اننگز کھیلی، راچن رویندرا 32، ڈیرل مچل ایک رن بنا کر پویلین لوٹ گئے۔کپتان ٹام لیتھم 68 اور مین آف دی میچ گلین فلپس 71 رنز بنا کرپویلین لوٹے ۔
افغانستان کی جانب سے عظمت عمرزئی اور نوین الحق نے 2،2 جبکہ مجیب الرحمان اور راشد خان نے ایک ایک وکٹ حاصل کی۔
افغانستان کی طرف سے رحمت شاہ 36 رنز بنا کر ٹاپ اسکورر رہے ۔
یادرہے کہ کیویز نے ابھی تک ایونٹ میں تین میچز کھیلے ہیں اور تمام میں ہی فتح ان کے نام رہی، دوسری جانب انگلینڈ کو اپ سیٹ شکست دینے والی افغانستان نے تین میں سے ایک میچ جیتا اور دو میچز میں شکست کا سامنا کرنا پڑا ہے۔
