کراچی : گلستان جوہر میں ڈاکووں کی فائرنگ سے تین بہنوں کا اکلوتا نوجوان بھائی جاں بحق ہوگیا۔
گلستان جوہر نعمان ایونیو کے قریب موٹرسائیکل سوار دو ملزمان نے فائرنگ کرکے نوجوان کو قتل کردیا اور فرار ہوگئے۔ پولیس اور ریسکیو عملے نے موقع پر پہنچ کر لاش کو ضابطے کی کارروائی کیلیے جناح اسپتال منتقل کیا۔
مقتول کے اہلخانہ و رشتے دار بھی اسپتال پہنچے۔ ایس ایچ او راجہ طارق نے بتایاکہ مقتول کی شناخت 23سالہ محمد سعد خان ولد انیس اجمل خان کے نام سے ہوئی جو نارتھ کراچی سیکٹر فائیو بی ون کا رہائشی تھا۔
ابتدئی تفتیش کے دوران معلوم ہوا کہ ملزمان مقتول کی موٹرسائیکل چھین رہےتھے سعد نے مزاحمت کی جس پر ملزمان نے گولیاں برسا دیں، مقتول کے پاس موبائل فون موجود تھا جو کہ پولیس کو نہیں ملا شبہ ہے کہ ملزمان موبائل فون چھین کر فرار ہوگئےْ پولیس کو جائے وقوع سے تیس بورپستول کاایک خول ملاہے۔
مقتول کے ایک رشتے دار نے اسپتال میں بتایا کہ سعد انیس خان طالب علم تھا اور بائیکا بھی چلاتا تھا ماموں کے ساتھ بھی فیکٹری میں آوٹ ڈور کا کام کرتا تھا تین بہنوں کا اکلوتا بھائی تھا کچھ عرصے بعد مقتول اور اسکی بہن کی شادی ہونے والی تھی پولیس مزید تفتیش کررہی ہے ۔
واضح رہے کہ رواں سال ڈاکووں نے مزاحمت پر 111افراد کو قتل کردیا ہے ۔
دوسری جانب سچل کے علاقے سپر ہائی وے الاصف اسکوائر کے قریب موٹرسائیکل سوار ملزمان نے فائرنگ کرکے 50سالہ جاوید خان کو زخمی کردیا جس کو عباسی شہید اسپتال منتقل کیا گیا ، ایس ایچ او نور محمد شیخ نے بتایاکہ واقعہ نامعلوم سمت کی گولی پیش آیا ہے تاہم پولیس مزیدتفتیش کررہی ہے ۔
