شہر قائد کے علاقے لیاری میں مقیم جماعت اسلامی کے سابق رکن سندھ اسمبلی کے گھر پر نامعلوم افراد فائرنگ کر کے فرار ہوگئے۔
تفصیلات کے مطابق سابق ایم پی اے جماعت اسلامی سید عبدالرشید کے گھر کے باہر نامعلوم افراد نے ہوائی فائرنگ کی اور فرار ہوگئے۔ سابق ایم پی اے نے بتایا کہ لیاری کے علاقے بہارکالونی لیاری میں گھر کے باہر نامعلوم افراد نے ہوائی فائرنگ کی تھی۔
انہوں نے تصدیق کی کہ فائرنگ سے کوئی جانی نقصان نہ ہوا تاہم موقع سے پولیس کو نائن ایم ایم کے دو خول ملے ہیں۔
واقعے کے وقت سابق ایم پی اے جماعت اسلامی کے دفتر میں تھے اور اطلاع ملتے ہی گھر پہنچے۔ پولیس کا کہنا ہے کہ بظاہر معاملہ خوف و ہراس پھیلانے اور ڈرانے دھمکانے کا معلوم ہوتا ہے تاہم واقعے کی تحقیقات جاری ہیں۔
