شہر قائد کے علاقے سائٹ سپر ہائی وے میں مبینہ طور پر ڈاکو کو سیلف ڈیفنس پر فائرنگ سے قتل کرنے والے ملزم کو پولیس نے گرفتار کرلیا۔
تفصیلات کے مطابق سائٹ سپر ہائی وے میں گزشتہ روز ڈکیتی مزاحمت پر ڈاکو کو مارنے والے شہری جاوید کو پولیس نے گرفتار کر کے مقدمہ درج کرلیا اور واردات میں استعمال ہونے والا پستول بھی برآمد کرلیا۔
پولیس کے مطابق گزشتہ روزشہری کی فائرنگ سے ڈاکوکوہلاک کرنےکی وڈیووائرل ہوئی تھی جس کی تحقیقات میں یہ بات سامنے آئی کہ گرفتار شہری زخمی کا رشتہ دار ہے۔
پولیس کے مطابق ڈاکوؤں کی فائرنگ سے گزشتہ روز ایک شہری بھی زخمی ہوا تھا۔
ترجمان سندھ پولیس کے مطابق اس معاملے کی مزید تفتیش جاری ہے جس کی نگرانی ایس ایس پی انویسٹیگیشن ونگ ڈسٹرکٹ ایسٹ کررہے ہیں۔
پولیس نے شہریوں پر واضح کیا کہ ہے کہ ایسے واقعات میں ایمرجنسی 15 اور علاقہ پولیس کو اطلاع دینا قانونی ذمہ داری ہے ۔ زخمی خواہ ڈاکو ہی کیوں نہ ہو، اسے پولیس کے حوالے کرنا قانون کا تقاضا ہے اور وہ واقعات جن میں کچھ اشخاص قانون سے بالا قدم اٹھائیں ان کے خلاف قانونی کاروائی کا سبب بنیں گے۔
