کراچی: ایم کیو ایم کے سابق اور پیپلزپارٹی کے موجودہ اہم رہنما رضا ہارون نے گورنر سندھ کامران ٹیسوری کے دفاع پر متحدہ اراکین کو جواب دیا ہے۔
انہوں نے ایم کیو ایم کے اراکین سندھ اسمبلی کے بیان پر ردعمل دیتے ہوئے کہا کہ سندھ کے ناکام ترین گورنر کامران ٹیسوری کے دفاع میں ایم کیوایم بھی ناکام ہوگئی ہے، ایم کیوایم اراکین سندھ اسمبلی کی جانب سے بےسروپا بیانات چلائے جارہے ہیں جو حقائق سے دور ہیں۔
رضا ہارون نے کہا کہ ہمیں اطلاع ہے کہ نئے گورنر کے انتخاب پر وقار مہدی کے بیان کی سب سے زیادہ خوشی ایم کیوایم کو ہی ہوئی ہے، متحدہ ایم کیوایم رہنما اندرونی طور پر انتشار کا شکار ہیں اور کامران ٹیسوری کی تبدیلی چاہتے ہیں، وقار مہدی نے ان ہی کے جذبات کی ترجمانی کی ہے۔
اُن کا مزید کہنا تھا کہ ایم کیو ایم گورنر سندھ کی نامزدگی پر مسلم لیگ ن کو بلیک میل کررہی ہے، وقار مہدی کی حیثیت کو کاغذی قرار دینے والوں کی اپنی حیثیت مشکوک ہے۔
