کراچی: محکمہ موسمیات نے شہر قائد میں آئندہ 24 گھنٹوں کےدرمیان درجہ حرارت مزید بڑھنے کی پیش گوئی کردی اور شہریوں کو ہیٹ اسٹروک کے ممکنہ خطرے کے پیش نظر احتیاطی تدابیر کی ہدایت کردی ہے۔
محکمہ موسمیات نے کراچی میں اتوار سے بدھ تک گرمی میں اضافے کی پیشگوئی کی ہے اور اتوار کے روز پارہ 39 ڈگری تک ریکارڈ کیا گیا۔
محکمہ موسمیات کے مطابق آئندہ 24 گھنٹوں کے دوران بھی موسم گرم رہے گا اور درجہ حرارت 37 سے 39 ڈگری سینٹی گریڈ تک بڑھنے کا امکان ہے جب کہ شہر میں آج درجہ حرارت 39 سے 40 ڈگری تک جاسکتا ہے۔
محکمہ موسمیات کا کہناہےکہ شہر میں ہوا میں نمی کا تناسب 35 فیصد ہے جب کہ شمال یا مغربی علاقوں سے ہلکی ہوائیں چل سکتی ہیں۔
