بدعنوانی کے مقدمے میں گرفتار سابق چیئرمین فشری نثارمورائی کا ایک ساتھی اور کراچی فشرمین کوآپریٹیو سوسائٹی فنانس ڈیپارٹمنٹ کے ملازم شاہد صدیقی دل کا دورہ پڑنے کے باعث انتقال کرگئے۔
کراچی فشرمین سوسائٹی کے فنانس مینیجر شاہد صدیقی کو گزشتہ دنوں کرپشن کیس میں گرفتار کیا تھا اور وہ سینٹرل جیل میں قید تھے۔ انہیں سینٹرل جیل سے نیب عدالت لاتے ہوئے مبینہ طور پر دل کا دورہ پڑنے سے انتقال کرگیا۔
ڈی آئی جی جیل خانہ جات ناصر آفتاب کے مطابق فشری ریفرنس کے تمام ملزمان کو احتساب عدالت میں پیشی کے لئے لایا جا رہا تھا کہ شاہد صدیقی کو گاڑی میں بیٹھے ہوئے دل کا دورہ پڑا۔
شاہد صدیقی اور دیگر کئی فشری ملازمین کو فشری کرپشن کیس میں سابق چیئرمین نثار مورائی کے سہولت کار کے طور پر گرفتار کیا گیا تھا۔
شاہد صدیقی بلدیہ ٹاؤن کے رہائشی تھے، جیل حکام کے مطابق گزشتہ روز انہیں دل کا عارضہ لاحق ہوا تھا اور انہیں جیل سے آغا خان اسپتال لایا گیا۔
ذرائع کے مطابق آغاخان اسپتال کی انتظامیہ نے انہیں علاج کی غرض سے اسپتال میں داخل کرنا چاہا تھا مگر شاہد صدیقی نے مہنگے اسپتال میں علاج کی طاقت نہ رکھنے کی بنا پر علاج سے معذرت کر لی تھی جس کے بعد انہیں کسی سرکاری اسپتال لے جانے کی بجائے جیل منتقل کردیا گیا تھا۔
