اسلام آباد: وفاقی وزیر خزانہ نے انکشاف کیا ہے کہ حکومت کو معاشی مسائل کا سامنا ہے، ابتدائی 9 ماہ میں 4 ارب 20 کروڑ ڈالرز قرضوں میں اضافہ ہوا۔
وفاقی وزیر خزانہ اسد عمر نے کہا ہے کہ حکومت بجٹ سے قبل حکومت نئی ٹیکس ایمنسٹی اسکیم متعارف کرائے گی۔ اسلام آباد میں میڈیا سے غیر رسمی گفتگو کرتے ہوئے اسد عمر کا کہنا تھا کہ ایمنسٹی اسکیم کا مطالبہ تاجر برادری کررہی ہے، اس ضمن میں حکومت نے معاشی مسودہ تیار کیا۔
اُن کا کہنا تھا کہ حکومت نے اپوزیشن کے ساتھ میثاقِ معیشت مسودہ تیار کیا جو جمعرات کے روز خزانہ کمیٹی کو پیش کیا جائے گا۔ ہمیں برآمدات اور ترسیلات زر میں اضافہ کرنا ہے۔ وفاقی وزیر کا کہنا تھا کہ آئی ایم ایف سے مذاکرات جاری ہیں، حکومت کی کوشش ہے کہ یہ آخری پروگرام ہی ہو۔
پیٹرولیم مصنوعات کی قیمتوں پر تبصرہ کرتے ہوئے اُن کا کہنا تھا کہ پیٹرولیم مصنوعات کی قیمتوں کا تعین اوگرا کرتا ہے، پیٹرول کی قیمت 75 روپے 57 پیسے ہے جبکہ اس پر 23 روپے 30 پیسے ٹیکس وصول کیا جارہا ہے اس لیے عوام کو 98 روپے 89 پیسے میں فروخت ہورہا ہے۔
اُن کا کہنا تھا کہ سپریم کورٹ نے جہانگیر ترین کو پبلک آفس کے لیے نااہل کیا، اس کا ہرگز یہ مطلب نہیں کہ اب وہ ملک کے شہری نہیں رہے، وزیر اعظم سمجھتے ہیں کہ جہانگیر ترین مفید مشورے دے سکتے ہیں تو اُن کے اجلاسوں میں بیٹھنے کی کوئی ممانعت نہیں ہے۔
وفاقی وزیر کا کہنا تھا کہ ہماری حکومت کے ابتدائی 9 میں 4 ارب 20 کروڑ ڈالرز قرضوں میں اضافہ ہوا، رواں مالی سال قرضوں پرسودکی مدمیں حکومت 2ہزارارب روپےاداکرے گی۔
اُن کا مزید کہنا تھا کہ غیر ملکی کرنسی اکاؤنٹس کےغلط استعمال سےبیرون ملک جائیدادیں بنائی گئیں، اس قانون میں ترمیم کی ضرورت ہے جس پر تیزی سے کام جاری ہے، ہرصحت مند،مہذب معاشرےمیں ویلتھ ٹیکس لگایاجاتاہے، ترقی یافتہ ممالک میں امیر لوگ زیادہ ٹیکس دیتے ہیں۔
