میڈیا ریاست کا اہم ستون ہے، ڈاکٹر عبدالقدیر خان
صحافیوں کو درپیش مشکلات میں میڈیا مالکان کیساتھ حکومت کا بھی بڑا ہاتھ ہے،بہتر پالیسی اپنانا ہوگی
عمیر علی انجم صحافیوں کے حقوق کے لیے جو جدوجہد کررہے ہیں وہ قابل ستائش ہے،ہر ممکن تعاون کو تیار ہوں
کراچی (اسٹاف رپورٹر) معروف ایٹمی سائنسدان ڈاکٹر عبدالقدیر خان نے کہا ہے کہ میڈیا ریاست کا اہم ستون ہے، صحافیوں کو درپیش مشکلات میں میڈیا مالکان کے ساتھ حکومت کا بھی بڑا ہاتھ ہے۔عمیر علی انجم صحافیوں کے حقوق کے لیے جو جدوجہد کر رہے ہیں وہ قابل ستائش ہے ۔
ان خیالات کا اظہار انہوں نے دو روز قبل نیوز ایکشن کمیٹی کے کنوینر عمیر علی انجم سے بات چیت کرتے ہوئے کیا ۔عمیر علی انجم نے انہیں صحافیوں کی جبری برطرفیوں، تنخواہوں میں کٹوتی، حکومت و میڈیا مالکان کی بے حسی اور صحافتی تنظیموں کی خاموشی کے حوالے سے تفصیلی طور پر آگاہ کیا
۔ڈاکٹر عبدالقدیر خان نے کہا کہ وہ صحافیوں کی جدوجہد میں ان کے ساتھ ہیں، حکومت کو چاہیے کہ وہ میڈیا بحران کے حل کے لیے سنجیدگی کا مظاہرہ کرے اور اس حوالے سے ٹھوس ترین اقدامات کرے۔ انہوں نے کہا کہ اس بحران میں میڈیا مالکان سے زیادہ حکومت کا ہاتھ ہے ۔انہوں نے بھرپور جدوجہد کرنے پر عمیر علی انجم کی ستائش کرتے ہوئے اپنے بھرپور تعاون کا یقین دلایا۔
