اسلام آباد کی انسداد دہشت گردی عدالت نے توہین عدالت اور توہین ججز کیس کا فیصلہ سناتے ہوئے فیصل رضا عابدی کو باعزت بری کردیا۔
تفصیلات کے مطابق انسداد دہشت گردی کی عدالت میں توہین عدالت کیس کی سماعت ہوئی جس میں فیصل رضا عابدی نے اپنے وکلاء اور میڈیا ایوائزرز کے ہمراہ شرکت کی۔
انسداد دہشت گردی کی عدالت نے فیصل رضا عابدی کو بے گناہ قرار دیتے ہوئے انہیں بری قرار دیا۔ سوشل میڈیا ایکٹوسٹ عمیر سولنگی کا کہنا تھا کہ ’’ عدالت نے دہشت گردی کے دونوں مقدمات میں سابق سینیٹر فیصل رضا عابدی کو بری کردیا‘‘۔
یاد رہے کہ 9 اپریل کی سماعت پر فیصل رضا عابدی نے اپنا دفاعی بیان عدالت میں ریکارڈ کرایا تھا۔
اسلام آباد کی انسداد دہشتگردی عدالت کی عدالت میں فیصل رضا عابدی کے خلاف اعلی عدلیہ کے خلاف نازیبا الفاظ استعمال کرنے کے کیس کی سماعت ہوئی تھی جس میں پیپلزپارٹی کے سابق سینیٹ نے اپنے دفاع میں بیان قلم بند کرایا۔
انسداد دہشتگردی عدالت اسلام آباد نے دہشتگردی کے دونوں مقدمات میں سید فیصل رضا عابدی کو بری کردیا۔ عدالت کے باہر لی گئی تصویر 😎#HaqKiFatah pic.twitter.com/HrQ1BTNiDi
— Umair Solangi (@UmairSolangiPK) May 2, 2019
فیصل رضا عابدی نے عدالت میں جمع کرائے گئے بیان میں کہا تھا کہ عدلیہ کی آزادی کے لئے میں پیش پیش تھا، 12 مئی 2007 کو میرے 17 ساتھی بھی شہید ہوئے۔ اُن کا کہنا تھا کہ آئینِ پاکستان کے تحت ساری عدالتوں کے حکم ناموں کا احترام کرتا ہوں مگر سپریم جوڈیشل کونسل نے مجھے اختیار دیا ہے کہ کوئی بھی کورٹس آئین کی خلاف ورزی کرے تو اُس پر تنقید کرنا میرا حق ہے۔
انہوں نے مؤقف اختیار کیا تھا دو سابق چیف جسٹس کے خلاف سپریم جوڈیشل کونسل میں ریفرنسز دائر کئے ہیں، ساری زندگی آئینِ پاکستان اور ملک کا دفاع کیا آئندہ بھی کروں گا، میں نے کبھی کسی ادارے کو دھمکی نہیں دی، عدالت یا ججز کی توہین کا سوچ بھی نہیں سکتا۔
یاد رہے کہ گزشتہ برس ایک ٹی وی چینل پر فیصل رضا عابدی نے بیان دیا تھا جسے سابق چیف جسٹس نے توہین عدالت قرار دیتے ہوئے نوٹس لیا تھا، بعد ازاں اُن کے خلاف مقدمہ درج ہوا اور انہیں کئی دنوں تک حراست میں بھی رکھا گیا البتہ پھر انہیں ضمانت پر رہا کیا گیا۔
