کراچی سے تعلق رکھنے والے سینئر اور معروف ڈرامہ ڈائریکٹر سید عاطف حسین گردے ناکارہ ہونے کی وجہ سے انتقال کرگئے، وہ گزشتہ دو روز سے آغا خان اسپتال میں وینٹی لیٹر پر تھے۔
اہل خانہ کے مطابق عاطف حسین گزشتہ کچھ عرصے سے علیل تھے وہ ڈائیلاسسز پر زندگی بسر کررہے تھے انہیں رمضان المبارک کے آغاز پر آغا خان اسپتال میں داخل کرایا گیا تھا۔
عاطف حسین نے آر وائی کے معروف ڈرامے ’ببن خالہ کی بیٹیاں‘ میں بھی ہدایت کاری کی تھی علاوہ ازیں انہوں نے متعدد ڈرامے بھی ڈائریکٹ کیے جن میں زندگی دھوپ تم گھنا سایا، ایک تمنا لاحاصل، بے قصور وغیرہ قابل ذکر ہیں۔ انہیں دو روز تک نجی اسپتال میں وینٹی لیٹر پر رکھا گیا، اب سے کچھ دیر قبل ڈاکٹرز نے اُن کی موت کی تصدیق کرتے ہوئے بتایا کہ عاطف حسین کا انتقال گردے فیل ہونے کی وجہ سے ہوا۔
مرحوم کی نمازجنازہ کل بعد نماز عصررحمانیہ مسجدطارق روڈپرادا جائے گی۔
ان کے انتقال کی خبر سنتے ہی سماجی رابطے کی ویب سائٹ ٹوئٹر پر ان کے لیے تعزیتی پیغامات آنے شروع ہوگئے۔
