اسلام آباد: دفتر خارجہ اور وزیراعظم کے معاونِ خصوصی نعیم الحق نے تصدیق کی ہے کہ عمران خان نے مودی کو ٹیلی فون کر کے دوبارہ اقتدار ملنے پر مبارک باد دی۔
نعیم الحق نے بتایا کہ وزیراعظم نے مودی کو مسئلہ کشمیر سمیت تمام تصفیہ طلب مسائل پر مذاکرات کی دعوت دیتے ہوئے ایک بار پھر بات چیت کا باب کھولنے کی دعوت دی۔
انہوں نے بتایا کہ عمران خان نے مودی کو کال کر کے دوبارہ بھاری اکثریت سے منتخب ہونے پر مبارک باد پیش کی اور ساتھ ہی مسئلہ کشمیر سمیت حل طلب مسائل پر مذاکرات کی دعوت بھی دی۔
نعیم الحق کا کہنا تھا کہ وزیراعظم نے مودی کے سامنے مؤقف پیش کیا کہ پاکستان اور بھارت کے درمیان امن قائم کر کے ہی عوام کو خوشحالی دی جاسکتی ہے۔
قبل ازیں اطلاع سامنے آئی تھی کہ وزیر اعظم عمران خان نے پڑوسی ملک بھارت کے وزیر اعظم نریندر مودی کو فون کر کے دوسری بار انتخابات میں جیت پر مبارک باد دی۔
دفتر خارجہ کے ترجمان نے کہا ہے کہ عمران خان نے بھارتی وزیر اعظم نریندر مودی کو فون کر کے انتخابات میں کام یابی پر مبارک باد دی اور مستقبل میں عوام کی بہتری کے لیے ساتھ کام کرنے کی بھی پیش کش کی۔
دوسری جانب بھارتی وزیراعظم نے اپنی تقریبِ حلف برداری میں عمران خان کو نہ بلانے کا فیصلہ کیا۔ بھارتی وزیراعظم نریندر مودی کی تقریب حلف برداری 30 مئی کو ہوگی جس میں مختلف ممالک کے سربراہان مملکت کو مدعو کرنے کا فیصلہ کیا گیا۔
میڈیا رپورٹس کے مطابق تقریب حلف برداری میں شرکت کے لیے سری لنکا، روس اور فرانسیسی صدور کے علاوہ اسرائیلی وزیر اعظم کو بھی مدعو کیا جائے گا، علاوہ ازیں ابوظہبی کے ولی عہد محمد بن زاید النہیان اور بنگلا دیشی وزیراعظم شیخ حسینہ واجد کو بھی مدعو کیا جائے گا۔
بھارتی میڈیا سے بی جے پی ذرائع کے حوالے سے بتایا ہے کہ نریندرمودی کی تقریب حلف برداری میں وزیراعظم پاکستان عمران خان کو مدعو نہیں کیا جائے گا۔
