ٹویٹر کی بلیو ٹک سروس دوبارہ شروع

ٹویٹر کی بلیو ٹک سروس دوبارہ شروع

سماجی رابطے اور مائیکروبلاگنگ کی ویب سائٹ ٹویٹر نے اپنے صارفین کی دیرینہ خواہش کو دیکھتے ہوئے بلیو ٹک ویریفائیڈ اکاؤنٹس سروس دوبارہ شروع کرنے کا اعلان کردیا۔

ٹویٹر کی جانب سے جاری ہونے والے اعلامیے میں بتایا گیا ہے کہ اکاؤنٹ ویریفیکیشن سروس کا آغاز آئندہ برس 2021 سے ہوگا، اب کی بار بلیو ٹک حاصل کرنے کا طریقہ پہلے سے زیادہ آسان ہوگا۔

نئی پالیسی کے تحت ٹوئٹر کی جانب سے آغاز میں 6 اقسام کے اکاؤنٹس کو ویریفائی کیا جائے گا، جن میں حکومتی عہدیداران، کمپنیاں، برانڈز، غیرمنافع بخش ادارے، نیوز، انٹرٹینمنٹ، اسپورٹس اور سماجی ادارے اور دیگر بااثر شخصیات شامل ہیں۔

کمپنی کے مطابق ان کیٹیگریز میں وقت کے ساتھ توسیع کی جائے گی۔

ٹوئٹر کی جانب سے بلیو ٹک کا مقصد عوامی شخصیات کے اکاؤنٹس کو مستند بنانا ہوتا ہے مگر عام افراد کے لیے اس عمل کو 2017 میں روک دیا گیا تھا، اس وقت کمپنی کو اس الجھن کا سامنا تھا کہ وہ لوگوں کو یہ کیسے بتائے کہ ویریفائیڈ کا مطلب کیا ہے۔

2018 میں ٹوئٹر نے ویریفکیشن سسٹم کو بہتر بنانے کا اعلان کیا تھا، جس میں بلیوٹک کے حصول کا عمل طویل کیا گیا تھا، تاہم وہ بھی کارآمد ثابت نہیں ہوسکا۔