لاہور:پی سی بی مینجمنٹ کمیٹی نے قومی کرکٹ ٹیم کے سابق کپتان شاہد آفریدی کو عبوری سلیکشن کمیٹی کاچیف سلیکٹر مقرر کر دیا ہے۔
گزشتہ روز پی سی بی مینجمنٹ کمیٹی کے دوسرے اجلاس میں چیئرمین نجم سیٹھی کی صدارت میں عبوری سلیکشن کمیٹی کی منظوری دی گئی۔ عبوری سلیکشن کمیٹی کے چیئرمین شاہد آفریدی ہوں گے جبکہ سابق ٹیسٹ آلراؤنڈر عبد الرزاق، سابق ٹیسٹ فاسٹ باؤلر راؤ افتخار احمد رکن اورسابق ٹیسٹ کرکٹر و کوچ ہارون رشید کنوینر ہوں گے۔
نجم سیٹھی نے کہا تھا کہ شاہد آفریدی کو اپنی مصروفیات کی وجہ سے وضاحت درکار تھی، اُنہیں بتایا ہے کہ ضرورت پڑنے پر اُن کے تجربے سے فائدہ اٹھایا جائے گا۔
پی سی بی مینجمنٹ کمیٹی چیئرمین نے کہا تھا کہ شاہد آفریدی سے ویڈیو لنک پر مشاورت ہوگی، مصروفیات سے فراغت پر وہ میٹنگ میں آئیں گے۔تاہم انہیں اب چیئرمین سلیکشن کمیٹی بنا کرنیوزی ل ینڈ کے خلاف ون ڈے انٹرنیشنل میچوں کے لئےٹیم تشکیل دینے کی ذمہ داری سونپی گئی ہے۔
نجم سیٹھی نے کہا ہے کہ شاہد آفریدی اپنے تیس سا لہ کرکٹ تجربہ سے بہتر ٹیم بنانے میں کامیاب ہو جائیں گے۔ شاہد آفریدی نے کہا ہے کہ وہ مینجمنٹ کمیٹی کے مشکور ہیں۔ جلد ہی سلیکشن کمیٹی کا اجلاس بلا کر ٹیم کی تشکیل بارے مشاورت کریں گے۔
