کراچی: گورنر سندھ کامران ٹیسوری نے کہا ہےکہ کراچی میں بھارت کی 22 سالہ سرمایہ کاری ہے تاکہ یہ شہر ترقی نہ کرے، ”را“ کی سرمایہ کاری کے تالے توڑ دیئے جائیں گے، ہر جگہ جاتا رہوں گا اور ایکشن لیتا رہوں گا، سیاسی معاملات میں مداخلت نہیں کرسکتا، سب کو ملکر شہر کی حالت بہتر بنانی ہے۔
ان خیالات کا اظہار انہوں نے ایڈمنسٹریٹر کراچی کے ہمراہ ضلع وسطی کے ہنگامی دورے پر ناگن چورنگی میں میڈیا سے گفتگو کے دوران کیا۔
وہ ناظم آباد، نارتھ ناظم آباد، لیاقت آباد، عزیز آباد بھی گئے اور ترقیاتی کاموں کا جائزہ لیا، گورنر سندھ نے کہا کہ رات دن کوشش کررہے ہیں شہر کی فٹ پاتھوں کو ٹھیک کریں اور سڑکوں پر پڑے گڑھے پر کئے جائیں، مجھے کہا گیا کہ دورے محدود کروں، خواہش ہے وسطی کو ماڈل ضلع بنایا جائے، سڑکوں کی تعمیر و مرمت کا کام تیز کیا جائے۔
گورنر سندھ کامران ٹیسوری نے مقامی سینما میں ایڈمنسٹریٹر کراچی کے ہمراہ فلم مولا جٹ دیکھی اور کہا کہ ایک سیاسی رہنما نے مجھے مولا جٹ کہا تھا، اس لئے یہ فلم دیکھنے آیا، سماجی برائیوں کے خلاف مولا جٹ کی طرح گنڈاسہ اٹھانا پڑے گا، گنڈاسہ ملک دشمنوں کے خلاف استعمال کروں گا۔
ان کاکہنا تھاکہ کراچی معیشت کا حب ہے، 10 برسوں میں شہر کی تباہی بہت زیادہ ہوئی، بلدیاتی انتخابات پر سوال پر گورنر نے کہا کہ ایم کیو ایم الیکشن کمیشن، سندھ حکومت سے رابطے میں ہے، کیوں کہ انہیں حلقہ بندیوں پر اعتراض ہے، چاہتے ہیں کہ انہیں ٹھیک کیا جائے۔
