کراچی: سندھ ہائی کورٹ نے پیپلز پارٹی رہنما نجمی عالم کے بلدیاتی الیکشن میں حصہ لینے کے خلاف پی ٹی آئی کی درخواست مسترد کردی ہے۔
عدالت نے اپنے فیصلے میں کہا ہے کہ کاغذات نامزدگی کی منظوری کو پہلے متعلقہ فورم پر چیلنج کرنا چاہیے ، وکیل پی ٹی آئی نے موقف اختیار کیا کہ نجمی عالم واٹر بورڈ کے وائس چیئرمین ہیں اور الیکشن میں حصہ لے رہے ہیں سرکاری عہدے پر رہتے ہوئے الیکشن میں حصہ لینا خلاف قانون ہے۔چیف جسٹس نے کہا کہ آپ نے کاغذات نامزدگی کو چیلنج کیا تھا شہاب امام وکیل پی ٹی آئی نے کہا کہ صوبائی الیکشن کمیشن کو درخواست دی تھی مگر کوئی جواب نہیں آیا۔
چیف جسٹس نے استفسار کیا کہ آپ کے پاس اپیل کیلیے مجاز اتھارٹی کیا ہے اگر نجمی عالم منتخب بھی ہوگئے تو آپ کے پاس اپیل کا فورم ٹریبونل ہے آپ کو عدالت آنے سے پہلے کاغذات نامزدگی کو متعلقہ فورم پر چیلنج کرنا چاہیے تھا۔ عدالت نے درخواست ناقابل سماعت قرار دے دی ۔
