کراچی: سندھ ہائیکورٹ نے سندھ اسمبلی میں سیکریٹری سمیت 5 افراد کو 20 گریڈ میں بھرتیوں کے خلاف درخواست پر حیرت کا اظہار کردیا۔
جسٹس اقبال کلہوڑو نے کہا کہ پورے خاندان کو اسمبلی میں بٹھادیا گیا، جسٹس عدنان کریم میمن نے کہا کہ یہاں لوگوں کو نائب قاصد کی نوکری نہیں ملتی، وکیل نے بتایا کہ ایڈیشنل سیکریٹری نے رپورٹ جمع کرائی، اسپیکر سراج درانی نے حقیقت پر مبنی رپورٹ جمع کرانے پر ایڈیشنل سیکرٹری کو عہدے سے ہٹادیا، رپورٹ میں بھرتیوں کو خلاف ضابطہ قرار دیا گیا تھا۔
وکیل سندھ حکومت نے بتایا کہ ایڈیشنل سیکریٹری نے بغیر اجازات جواب جمع کرایا، ہمیں جواب کیلئے مہلت دی جائے، عدالت نے کہا کہ آخری موقع دے رہے ہیں، آئندہ سماعت پر جواب نہ ملاتو کارروائی کریں گے۔
عدالت نے اسمبلی ملازمین کا ریکارڈ طلب کرتے ہوئے سماعت 15 فروری تک ملتوی کردی۔
