کراچی: کراچی میں آئی جی سندھ غلام نبی میمن کی زیر صدارت اعلیٰ سطح کا اجلاس ہوا جس میں سیکیورٹی کی صورتحال کا جائزہ لیا گیا۔
انہوں نے کہا کہ کراچی پولیس آفس میں ہونے والے حملے کی تفتیش کو جلد از جلد منطقی انجام تک پہنچایا جائے۔اعلیٰ سطح کے اجلاس میں صوبے بھر کی سیکیورٹی کی صورتحال کا جائزہ لیا گیا، آئی جی سندھ نے کہا کہ کراچی پولیس چیف کے دفتر پر حملہ انتہائی لرزہ خیز واقعہ تھا۔ حملے کی تفتیش کو منطقی انجام تک پہنچائیں گے، واقعے کی تفتیش کےلیے ہائی پاورڈ کمیٹی بنادی ہے۔
آئی جی سندھ کا کہنا تھا کہ پولیس لائنز اور ان میں موجود مساجد کی سیکیورٹی کو مزید بہتر بنایا جائے۔ اس کے علاوہ اہم سرکاری دفاتر، عمارتوں، ٹریننگ سینٹرز، اسٹیبلشمنٹ اور دیگر کی سیکیورٹی پر خصوصی توجہ دی جائے جبکہ سیکیورٹی کے مجموعی اقدامات کو ریڈ الرٹ کیا جائے۔
انہوں نے کہا کہ شہیدوں کے ورثاء کا خیال رکھا جائے اور تمام زخمیوں کو بھرپور طبی سہولیات فراہم کی جائیں۔
