اسلام آباد: وفاقی وزیر برائے سائنس اینڈ ٹیکنالوجی نے اپوزیشن کو خبردار کیا ہے کہ وہ چیئرمین سینیٹ صادق سنجرانی کے خلاف تحریک عدم اعتماد نہ لائیں وگرنہ پھر منہ کی کھانی پڑے گی۔
فواد چوہدری کا کہنا تھا کہ حکومت 9.8ارب ڈالرقرضوں کی مدمیں واپس کرچکی، 7ارب قرض اور2.8ارب ڈالرسودکی مدمیں اداکیےہیں، ہمارااصل چیلنج ٹیکس وصولی کاہے کیونکہ اس سال ٹیکس وصولی کا ہدف 5 ہزار 600 ارب مختص کیا گیا۔
دوسری جانب اسلام آباد میں بڑی ہلچل ہے، صادق سنجرانی کے گھر پر تحریک انصاف کے سینیٹر ، بلوچستان عوامی پارٹی اور اتحادی جماعتوں کا اہم اجلاس ہوا، جس میں فیصلہ کیا گیا کہ اپوزیشن کی عدم اعتماد تحریک کو ناکام بنایا جائے گا۔
علاوہ ازیں تحریک انصاف کے سینئر رہنما نے کہا ہے کہ اپوزیشن کے پاس زیادہ نمبرز ہیں اور ممکن ہے کہ صادق سنجرانی کے خلاف تحریک کامیاب ہو مگر اُس سے قبل ہم بھی سیاسی حکمتِ عملی مرتب کریں گے۔ سابق صدر آصف زرداری چیئرمین کی تبدیلی کا عندیہ دے کر خود چیئرمین بنانے کا اعلان بھی کرچکے ہیں۔
