قومی کرکٹ ٹیم کے کپتان سرفراز احمد نے کہا ہے کہ میں اپنی پرفارمنس نے مطمئن ہوں کیونکہ اپنا بیسٹ دینے کی کوشش کی، کپتانی چھوڑنے کا کوئی ارادہ نہیں البتہ کرکٹ بورڈ اس کا حتمی فیصلہ کرے گا۔
وطن واپسی کے بعد ایک روز آرام کر کے سرفراز احمد نے کراچی کے نیشنل اسیٹیڈیم میں پریس کانفرنس کی اور اعتراف کیا کہ ابتدائی پانچ میچوں میں ٹیم کی کارکردگی اچھی نہ تھی البتہ بھارت سے شکست کے بعد ہمارے ساتھ جو واقعات ہوئے اُس کے بعد اچھے سے حالات کا اندازہ اور احساس ہوا۔
انہوں نے اشارتاً کہا کہ آخری کے چار میچز میں جب ہم نے تبدیلی کی اور حارث سہیل کو میں نے اپنی پوزیشن پر بھیجا تو صورتحال بہت مختلف ہوئی اور ہم نے اچھا کم بیک کیا مگر بدقسمتی سے رن ریٹ اور پچز کی وجہ سے ہم سیمی فائنل تک رسائی حاصل نہ کرسکے۔
سرفراز نے ٹیم میں اختلافات کے حوالے سے آنے والی خبروں کی تردید کرتے ہوئے مکی آرتھر اور ٹیم مینجمنٹ کی تعریف بھی اور ساتھ یہ بھی کہا کہ شعیب ملک کو آخری میچ میں موقع نہ دینے پر افسوس بھی ہوا۔
