نئی دہلی: بھارتی ریاست تامل ناڈو میں درندہ صفت باپ نے بیٹا پیدا نہ ہونے پر 15 دن کی بیٹی کو زندہ دفن کر کے مار ڈالا۔
بھارتی میڈیا رپورٹ کے مطابق مزدوری کے پیشے سے وابستہ 29 سالہ شخص ریاست تامل ناڈو کے علاقے ویلوپورم کا رہائشی ہے جسے پولیس نے حراست میں لیا تو اُس نے اپنے جرم کا اعتراف کیا اور بتایا کہ وہ بیٹے کا خواہش مند تھا مگر بیٹی پیدا ہوئی۔
ملزم نے بتایا کہ 15 روز کے دوران اُس نے دو بار بیٹی کو قتل کرنے کی کوشش کی البتہ وہ پیر کے روز کامیاب ہوا اور رات کو ماں کے سوتے ہوئے بچی کو لے کر دریا کے قریب گیا جہاں اُس نے بچی کو دفن کیا اور پھر وہ مر گئی۔
بعدازاں جب بیٹی کی غیر موجودگی میں ماں نے چیخ چیخ کر سب کو جمع کرلیا۔ جس کے بعد اہلخانہ اور پڑوسیوں نے پولیس کو مطلع کیا اور پولیس نے ڈی وراڈراجن کو گرفتار کیا تو سنگدل باپ نے بیٹی کو زندہ دفنانے کا جرم قبول کرلیا۔ پولیس نے دیگر حکام کی موجودگی 17 دن کی بچی کی لاش برآمد کرلی۔ پولیس نے ملزم کے خلاف 302، 315 اور 498 اے کے تحت مقدمہ درج کرکے ڈی وراڈراجن کو گرفتار کرلیا۔
