لاہور: پنجاب کے شہر مظفر گڑھ کے سرکاری اسپتال میں مرنے والے نومولود نے اُس وقت سانسیں لینا شروع کیں جب اُس کی ماں انتقال کا سُن کر زار و قطار رو پڑی۔
جیو نیوز کی رپورٹ کے مطابق صوبہ پنجاب کے شہر مظفر گڑھ کے سرکاری اسپتال میں ڈاکٹر نے نومولود زندہ بچے کو مردہ قرار دے دیا، ماں کے رونے پر نرس نے بچے کو آکسیجن لگائی تو بچے کی سانسیں بحال ہوگئیں۔
ذرائع کے مطابق یہ واقعہ سرکاری اسپتال کے ڈاکٹرز کی مبینہ غفلت کی وجہ سے پیش آیا، بچےکی والدہ کے مطابق نومولود بچے کی طبیعت خراب ہونے پر ڈاکٹر نے اس کا چیک اپ کیا اور اسے مردہ قرار دیا۔
خاتون کا کہنا تھا کہ وہ اپنی گود اجڑنے کا سُن کر رونے لگیں، بات کو دبانے کے لیے نرس نے ترس کھا کر بچے کو آکسیجن لگائی تو اُس کی سانسیں بحال ہوگئیں۔ ڈاکٹرز نے بچے کی طبیعت کو خطرے سے باہر قرار دے دیا۔
