کراچی: شہر قائد کے علاقے ناظم آباد تین نمبر میں واقع انو بھائی پارک کے قریب سے کھدائی کے دوران بڑی تعداد میں انسانی ہڈیاں برآمد ہوئی جو کئی سال پرانی بتائی جارہی ہیں۔
عینی شاہد کے مطابق گرین لائن منصوبے کی کھدائی کے دوران مزدوروں کو زمین میں دفن کپڑے کے تھیلے برآمد ہوئے جنہیں کھولا گیا تو اُن میں انسانی ہڈیاں موجود تھیں، منتظمین نے فوری طور پر پولیس کو واقعے کے حوالے سے مطلع کیا جس کے بعد ایس ایس پی سینٹرل عارف اسلم راؤ نفری کے ہمراہ جائے وقوعہ پہنچے۔
پولیس نے مزید تحقیقات کے لیے ہڈیوں کے تھیلے ڈاکٹرز کے سپرد کردیے۔ پولیس افسر کا کہنا تھا کہ ’ابھی اس معاملے پر کچھ بھی کہنا قبل ازوقت ہوگا، البتہ ابتدائی طور پر معاملہ میڈیکل ویسٹیج کا معلوم ہوتا ہے کیونکہ پرانے دور میں آپریشن کے دوران ہڈیوں کو علیحدہ کردیا جاتا تھا‘۔
ایس ایس پی سینٹرل نے مزید بتایا کہ شوگر کے مریضوں کے جسمانی حصوں کو بھی کاٹ کر الگ کیا جاتا ہے، پہلے ان ہڈیوں کو مختلف جگہوں پر دفنا دیا جاتا تھا۔ انہوں نے یہ بھی کہا کہ اب کچھ سالوں سے ان ہڈیوں کو جدید طریقے سے ختم کر دیا جاتا ہے، اندازہ ہے کہ یہ ہڈیاں کئی دبائی پرانی معلوم ہوتی ہیں۔
