کراچی کے جناح اسپتال میں رات گئے نا معلوم افراد رات گئے 2 نوجوانوں کی لاشیں چھوڑ کر فرار ہوگئے، مقتول قمیص شلوار پہنے ہوئے ہیں۔
سینئر ایگزیکٹو ڈائریکٹر ڈاکٹر سیمی جمالی کے مطابق گزشتہ رات دونوں لاشوں کو علیحدہ علیحدہ لایا گیا، ایک رکشے جبکہ دوسری ٹیکسی میں آئی جن کی سی سی ٹی وی فوٹیج سامنے آگئی، لاشوں کے حوالے سے صدر تھانے کو اطلاع کردی۔
انہوں نے بتایا کہ لاشوں کو فنگر پرنٹس کی مدد سے شناخت کرنے کی کوشش کی جارہی ہے۔ سیمی جمال نے اے آر وائی نیوز کو بتایا کہ دونوں لاشوں کو جناح اسپتال کی ایمرجنسی میں مریض بنا کر لایا گیا تھا لیکن لانے والے انھیں چھوڑ کر چلے گئے، لاشوں کا ڈی این اے ٹیسٹ بھی لیا جائے گا، بہ ظاہر دونوں لاشوں پر گولی کا کوئی نشان نہیں ہے، دونوں لڑکوں کو نامعلوم افراد الگ الگ لے کر آئے تھے۔
تاحال لاشوں کا پوسٹ مارٹم نہیں کیا گیا ہے، اسپتال کی جانب سے پولیس کو آگاہ کرنے کے بعد رینجرز اور پولیس کے افسران جناح اسپتال پہنچ گئے، اسپتال ذرایع کا کہنا ہے کہ سی سی ٹی وی کی مدد سے لاشیں لانے والوں کا پتا چلایا جا رہا ہے۔
