لندن: ایم کیو ایم کے مقتول رہنما ڈاکٹر عمران فاروق کی اہلیہ شمائلہ عمران نے مقتول شوہر کے کیس میں آج پہلی بار باضابطہ بیان ریکارڈ کرایا۔
ڈاکٹر عمران فاروق قتل کیس کی لندن میں سماعت ہوئی جس میں مقتول رہنما کی اہلیہ نے پہلی بار باضابطہ طور پر اپنا بیان ریکارڈ کرایا۔ اس موقع پر پاکستان ہائی کمیشن کے حکام بھی مجسٹرٹیس کورٹ میں موجود تھے۔
ویڈیو لنک کے ذریعے ریکارڈ ہونے والے بیان میں شمائلہ عمران کا کہنا تھا کہ میرے شوہر کو سیکیورٹی پر خدشات تھے، جس کا ذکر انہوں نے پولیس سے بھی کیا تھا۔
انہوں نے بتایا کہ محسن علی سید اور کاشف خان کامران کو عمران فاروق سے ملتے ہوئے دیکھا، دونوں نے اپنا تعارف اے پی ایم ایس او کے رکن کی حیثیت سےکرایا تھا، میرے شوہر مقتول عمران فاروق کو شبہ تک نہیں تھا کہ یہ دونوں افراد انہیں قتل کرسکتے ہیں۔
