ضلع شرقی： تجاوزات کے خلاف کارروائیاں، مین ہولز بند کرنے کا کام تیزی سے جاری

بلدیہ شرقی کی جانب سے تجاوزات کیخلاف اقدامات جاری

نالہ صفائی کے ساتھ میں ہول کور رکھنے کے حوالے سے امور کی انجام دہی

سگ گزیدگی کے واقعات کی روک تھام کیلئے اقدامات

کراچی:. ڈپٹی کمشنر/ایڈمنسٹریٹر ڈی ایم سی ایسٹ سید محمد علی شاہ اور میونسپل کمشنر شعیب احمد ملک کی ہدایات پر مختلف بلدیاتی امور کے ساتھ تجاوزات کے خاتمے کے سلسلے میں امور انجام دئیے جارہے ہیں۔

اس حوالے سے یوسی 7 اور 8 طارق روڈ اور فیروزآباد ڈویژن کے علاقوں میں درجنوں کچی پکی تجاوزات کو ہٹا کر گزرگاہوں کو کلئیر کر دیا گیا ہے، مون سون سیزن سے قبل نالوں کی صفائ کو یقینی بنانے کے ساتھ مین ہول کور رکھنے کے حوالے سے بھی اقدامات بروئے کار لائے جارہے ہیں۔

سیکریٹری بلدیات سندھ سید نجم شاہ کی ہدایات پر گزشتہ ہفتے سے تاحال سگ گزیدگی کے واقعات کی روک تھام کیلئے بلدیہ شرقی کی جانب سے مہم جاری ہے یوسی 17 میں مہم کے دوران 44 آوارہ کتوں کی بیخ کنی کو یقینی بنایا گیا جبکہ ایف ٹی سی بلڈنگ کے سامنے راستوں کو ہموار کرنے اور اسے خوبصورت بنانے کیلئے صفائ ستھرائ کے بعد مٹی ڈالکر اسے ہموار کیا جارہا ہے، کورونا ودیگر مضر صحت جراثیم کے خاتمے کیلئے بھی روزانہ کی بنیاد پر مختلف یوسیز میں جراثیم کش ادویات کے چھڑکاؤ کو یقینی بنایا جارہا ہے۔
میونسپل کمشنر شعیب احمد ملک نے کہا ہے کہ ضلع شرقی میں بلدیاتی خدمات کو بہتری کی جانب گامزن کرنا اولین ترجیح ہے اسی لحاظ سے روزانہ مختلف بلدیاتی امور کی انجام دہی کے ذریعے بہتری لا رہے ہیں ترقیاتی اور بلدیاتی خدمات پر معمور محکمہ جات دستیاب وسائل میں رہتے ہوئے بلدیاتی خدمات کی فراہمی میں مصروف ہیں، مذکورہ بلدیاتی امور سپریٹنڈنگ انجنئیر سول سید اظہر حسین شاہ، ڈائریکٹر انسداد تجاوزات زاہد بن خلیل، ڈائریکٹر میونسپل سروسز توقیر عباس اور ایگزیکٹیو انجنئیرسلمان الرحمن میمن کی زیر نگرانی سر انجام دئیے گئے۔