کراچی : ماڈل و اداکارہ طوبیٰ انور نے انکشاف کیا ہے کہ کسی نامعلوم شخص نے ان کا موبائل نمبر لیک کردیا جس کے بعد انہیں متعدد انجان نمبروں سے انتہائی نامناسب اور نفرت انگیز پیغامات موصول ہو رہے ہیں۔
طوبیٰ انور نے اپنی متعدد انسٹاگرام سٹوریز میں انکشاف کیا کہ ان کا موبائل نمبر کافی دن پہلے کسی شخص نے لیک کردیا تھا اور انہیں متعدد نئے نمبروں سے مسلسل بے شمار نامناسب اور نفرت انگیز پیغامات موصول ہو رہے ہیں۔
انہوں نے تعجب کا اظہار کیا کہ ایسا کرنے والے افراد کے پاس فضول کا وقت کہاں سے آتا ہے اور وہ کس طرح ایسے کاموں میں اپنی توانائی ضائع کرتے ہیں جو دوسروں کے لیے پریشانی کا باعث بنتے ہیں۔
طوبی انور نے لکھا کہ خود کو بے بس اور بیمار محسوس کر رہی ہیں۔ اداکارہ نے بتایا کہ انہیں موصول ہونے والے پیغامات میں استعمال کی گئی زبان اس قدر غلیط اور نامناسب ہے کہ وہ ان کے سکرین شاٹ بھی شیئر نہیں کر سکتیں۔ متعدد ماہ سے برداشت کر رہی ہیں اور ان کا نمبر لیک کرنا کسی بھی ذاتی شخصیت کی نجی زندگی کے خلاف ہے اور یہ عمل انتہائی بیہودہ اور دوسروں کو تکلیف میں مبتلا کرنے والا ہے۔
طوبی انور نے لکھا کہ انہیں شک ہے کہ انہیں جن متعدد انجان نمبروں سے نفرت انگیز اور نامناسب پیغامات بھیجے جا رہے ہیں، ان میں سے کچھ نمبرز کے حامل افراد مسلسل ان کی نگرانی کر رہے ہیں اور وہ کبھی بھی انہیں نقصان پہنچا سکتے ہیں۔
طوبیٰ انور نے مذہبی سکالر عامر لیاقت سے 2018 کے وسط میں خفیہ شادی کی تھی، جس کا عامر لیاقت نے 2020 میں اعتراف کیا تھا۔
