کراچی: وزیر محنت و افرادی قوت سعید غنی کا کہنا ہےکہ آصف زرداری، فریال تالپور اور مراد علی شاہ کے خلاف بے بنیاد مقدمات کا ٹرائل راولپنڈی میں جاری ہے، آئین کے مطابق ٹرائل متعلقہ حدود میں ہونا چاہیئے۔
بیان میں انہوں نے کہا کہ سپریم کورٹ کے سابق چیف جسٹس نے بدنیتی کی بنیاد پر فیصلہ دیا کہ سندھ میں ہونے والے مبینہ جرم کا ٹرائل پنڈی میں ہوگا، پی پی رہنماؤں کے ساتھ زیادتی آج بھی جار ہے، اس کا ازالہ نہیں ہوسکا، پی پی کے پی ڈی ایم سے علیحدہ ہونے کے نتیجے میں زرداری کے کیسز کراچی منتقل کرکے این آر او لینے کا عمران نیازی کا بیان مضحکہ خیز ہے، پیپلز پارٹی پی ڈی ایم کی خالق ہے، عمران نیازی نے تحریک عدم اعتماد کے دوران زرداری سے مدد لینے کی کوشش کی تھی۔
انہوں نے کہا کہ بلدیاتی انتخابات کے بار بار التواء سے اہلیان کراچی اور کارکن مایوس ہورہے ہیں، وزیراعلیٰ سندھ سے اپیل ہےکہ وہ بلدیاتی الیکشن کو مزید موخر کرنے کیلئے الیکشن کمیشن کو اب کوئی خط نہ لکھیں، مزید التواء کا اب کوئی جواز نہیں۔
