کراچی : صوبائی وزیر اطلاعات و ٹرانسپورٹ شرجیل انعام میمن کی زیر صدارت پیپلز بس سروس سے متعلق اہم اجلاس میں پیپلز بس سروس کی نئی بسوں کی خریداری اور کراچی میں مزید روٹس پر بسیں چلانے پر غور و خوض کیا گیا۔ الیکٹرک بس سروس کے روٹس پر بھی تبادلہ خیال کیا گیا۔
اس موقع پرشرجیل انعام میمن نے کہا کہ سندھ حکومت نے پیپلز بس سروس کی مزید بسوں کی خریداری کی منظوری دے دی ہے اور ہدایا ت جا ری کی ہیں کہ بسوں کی خریداری کے عمل کو تیز کیا جائے،شہریوں کی جانب سے مختلف روٹس پر پیپلز بس سروس چلانے کا مطالبہ کیا گیا ہے۔
اجلاس میں الیکٹرک پیپلز بس سروس کے پہلے روٹ کو حتمی شکل دی گئی اور الیکٹرک بس سروس کافوری طور پر آغاز کرنے کی ہدایت کی گئی۔ اجلاس میں سیکریٹری ٹرانسپورٹ عبدالحلیم شیخ ، ایم ڈی سندھ ماس ٹرانزٹ اتھارٹی زبیر چنہ، پی ڈی این آر ٹی ایس صہیب شفیق ، آپریشن منیجر عبدالشکور آرائیں ، ای ڈی لیگل ایس ایم ٹی بشیر احمد ودیگر نے شرکت کی۔
