کراچی :امیر جماعت اسلامی سراج الحق نے کہا ہے کہ سندھ حکومت نے ریٹرننگ آفیسرز (آر اوز) پر اثر انداز ہوکر کراچی کے بلدیاتی انتخابات میں پیپلزپارٹی کو شہر کی بڑی پارٹی ثابت کرنے کی سازش کی۔ ا
انہوں نے کہاکہ لیکشن کمیشن کے جاری کردہ فارم 11 پر جماعت اسلامی کے پولنگ ایجنٹس کو موصول دستخط شدہ نتائج کے مطابق صوبائی دارلحکومت کی سب سے بڑی پارٹی جماعت اسلامی ہے۔ ہمارا مطالبہ ہے کہ ہمیں فارم 11کے مطابق سیٹیں دی جائیں، یہ ہمارا آئینی و جمہوری حق ہے ۔
ان کا کہناتھاکہ پی پی کے شریک چیئرمین آصف علی زرداری پارٹی کی سب سے ذمہ دار شخصیت ہیں انھیں پیغام دینا چاہتا ہوں کہ کراچی کو کنفیوژن سے نکالیں اور مقامی پیپلز پارٹی کو ہدایات جاری کریں کہ جماعت اسلامی کا مینڈیٹ واپس کیا جائے۔ امید ہے آصف زرداری ہماری بات سنیں گے ۔کراچی کے عوام کو لمبے عرصے بعد جماعت اسلامی کی صورت میں اہل اور ایمان دار قیادت ملی ہے ۔
اسلام آباد میں پریس کانفرنس کرتے ہوئے سراج الحق نے کہاکہ کراچی کے عوام نے جماعت اسلامی کو پذیرائی بخشی اس پر کل جمعہ کو ملک بھر میں یوم تشکر منائیں گے، اسی روز خود کراچی جاکر عوام کا شکریہ ادا کروں گا ، امیر جماعت اسلامی کراچی حافظ نعیم الرحمن اور ان کی ٹیم کو مبارکباد دیتا ہوں۔
انہوں نے مزید کہا کہ عبدالستار افغانی کو کراچی کے عوام نے دو مرتبہ میئر منتخب کیا، نعمت اللہ خان میئر بنے تو پوری دنیا میں ان کی کارکردگی کو سراہا گیا اور انہیں نمبر ون میئر کا اعزاز ملا۔ اب کی بار بھی کراچی نے جماعت اسلامی پر اعتماد کیا ،پی ڈی ایم، پیپلزپارٹی اور پی ٹی آئی تینوں نے مل کر عوام کو مشکلات سے دوچار کیا۔ ملک کو اس دلدل سے نکالنے کا واحد ذریعہ انتخابات ہیں ۔
