کراچی : متحدہ قومی موومنٹ پاکستان کی رابطہ کمیٹی نے کیماڑی مواچھ گوٹھ کے علاقے میں فیکٹری سے پھیلنے والی زہریلی گیس اور اس سے ہونے والی ہلاکتوں پر گہری تشویش کا اظہار کیا ہے اپنے بیان میں رابطہ کمیٹی نے کہا کہ کراچی پاکستان کو سب سے زیادہ ٹیکس دیتا ہے اس کے باوجود بھی کراچی کی عوام کو حکومت سندھ تحفظ فراہم کرنے کو تیار نہیں۔
ایم کیوایم رابطہ کمیٹی نے کہاہے کہ 15 سال سے اقتدار میں رہنے کے باوجود سندھ حکومت نے کراچی کو کھنڈرات میں تبدیل کردیا جو سندھ حکومت کی کارکردگی پر سوالیہ نشان ہے۔
اُنہوں نے کہا کہ رہائشی علاقوں میں فیکٹری کھولنے کی اجازت دینے والے افسران کے خلاف فوری کارروائی عمل میں لائی جائیں اور زہریلی گیس سے متاثر ہونے والے افراد کو فوری طبی امداد فراہم کی جائیں۔
رابطہ کمیٹی نے کہا کہ رہائشی علاقوں میں فیکٹری کھولنے کی اجازت دینے سے علاقوں میں رہائش پذیر افراد سانس اور جلدی امراض کا شکار ہونے کے ساتھ ساتھ انکے پھیپھڑے بھی اس آلودگی سے بری طرح متاثر ہورہے ہیں ۔
انہوں نے کہا کہ سندھ حکومت محکمہ ماحولیات کی کارکردگی کی وجہ سے شہریوں کی جان داو پر لگی ہوئی ہے اور سندھ حکومت کے ماتحت ادارے شہریوں کے تحفظ کرنے کے بجائے کرپشن کرنے میں مصروف ہے ان کو عوام کی کوئی فکر نہیں ۔
انہوں نے زہریلی گیس کے نتیجے میں جاں بحق افراد کے اہل خانہ سے دلی تعزیت و ہمدردی کا اظہار کرتے ہوئے جانبحق افراد کے درجات کی بلندی کے لیے دعا کی اور انہیں صبر کی تلقین کی، دکھ کی اس گھڑی میں ایم کیو ایم پاکستان انکے غم میں برابر کی شریک ہے۔
