کراچی: امیر جماعت اسلامی کراچی حافظ نعیم الرحمن نے کہا ہےکہ پیپلز پارٹی کی جاگیردارانہ سوچ کے مقابلے کیلئے اہلیان کراچی کا ساتھ حاصل ہے، مسئلہ میئر کا نہیں، شہر کو پی پی کی اجارہ داری اور آمریت سے بچانا ہے، میئر کے انتخاب کےبعد اسٹیل ملز کا مسئلہ اٹھائیں گے۔
ان خیالات کا اظہار انہوں نے ادارہ نور حق میں اسٹیل لیبر یونین پاسلو کے صدر عاصم بھٹی، جنرل سیکریٹری علی حیدر گبول کی قیادت میں وفد سے گفتگو کرتے ہوئے کیا۔
انہوں نے کہا کہ الیکشن کمیشن کی 2 فروری کی سماعت کےبعد چھینی گئی سیٹیں واپس مل جائیں گی، پیپلز پارٹی کی دھاندلی کا سد باب ہوگا، امید ہے پی ٹی آئی جیالے میئر کو روکنے میں کردار ادا کرے گی۔
وفد نے انہیں اسٹیل ملز کے حالات اور مزدورں کے مسائل سے آگاہ کیا اور بتایا کہ پیپلز پارٹی نے اسٹیل ملز کی زمین اور وسائل کی لوٹ مار پر نظریں لگائی ہوئی ہیں، مزدوروں کے مطالبات بھی پورے نہیں کئے جارہے۔
