پاکستان کے سب سے بڑے شہر کراچی میں پولیس نے شیلنگ اور واٹر کینن کے استعمال کے بعد پاک سر زمین پارٹی کے سربراہ مصطفیٰ کمال سمیت دیگر رہنماؤں کو رہا کر دیا ہے۔
مصطفی کمال نے رہائی کے بعد پیر کی علی الصبح میڈیا سے بات کرتے ہوئے کہا کہ وہ کراچی کی عوام کو سلام پیش کرتے ہیں جنھوں نے جابر اور ظالم حکمرانوں کو خوفزدہ کر دیا۔
مصطفیٰ کمال کو اُن کی خواہش پر گرفتار کیا گیا، ایس ایس پی بلدیہ pic.twitter.com/veNSHP6bw4
— ذرائع نیوز (@ZarayeNews) May 14, 2017
پاکستان سر زمین پارٹی کے سربراہ کا کہنا تھا کہ خواتین اور بچوں پر شیلنگ کی گئی۔
مصطفی کمال کا کہنا تھا کہ وہ آئندہ 48 گھنٹوں کے دوران اگلے لائحہ عمل کا اعلان کریں گے۔
خیال رہے کہ مصطفیٰ کمال نے شہر میں پانی کی عدم فراہمی، واٹر سیوریج بورڈ کی خود مختاری، سڑکوں کی تعمیر، تعلیم کی بہتری، کے الیکٹرک کی اوور بلنگ، شہر کے ہسپتال، سڑکوں اور پارکوں کے میٹروپولیٹن کے حوالے کرنے پر مشتمل 16 مطالبات کے حق میں وزیر اعلیٰ ہاؤس تک مارچ کا اعلان کیا تھا۔
مصطفیٰ کمال اور دیگر گرفتار افراد کو دو گھنٹے حراست میں رکھنے کے بعد رہا کردیا گیا pic.twitter.com/aKRneJmdNo
— ذرائع نیوز (@ZarayeNews) May 14, 2017
شاہراہ فیصل پر واقع ایف ٹی سی سینٹر سے اتوار کی شام اس مارچ نے چلنا شروع کیا لیکن چند قدم کے بعد پولیس نے عائشہ باوانی کالج کے قریب رکاوٹیں کھڑی کرکے انھیں روک دیا۔
پاکستان پیپلز پارٹی کے رہنما مرتضیٰ وہاب، وقار مہدی اور دیگر رہنما مظاہرین سے مذاکرات کے لیے پہنچے لیکن مصطفیٰ کمال نے مطالبات تحریری طور پر تسلیم کرنے کے علاوہ زبانی یقین دہانی تسلیم کرنے سے انکار کردیا۔
مصطفیٰ کمال کی قیادت میں کارکنوں نے آگے بڑھنے کی کوشش کی تو پولیس حکام نے انھیں بتایا کہ وہ ریڈ زون میں داخل نہیں ہوسکتےاس کے باوجود کارکن آگے بڑھے تو پولیس نے انھیں منتشر کرنے کے لیے واٹر کینن اور آنسو گیس کا بے دریغ استعمال کیا۔
Mustafa Kamal Arrest pic.twitter.com/WCzpsRDFiU
— ذرائع نیوز (@ZarayeNews) May 14, 2017
مصطفیٰ کمال نے پولیس حکام سے شکایت کی کہ انھوں نے ایک بھی پتھر نہیں پھینکا پھر شیلنگ کیوں کی گئی جس کے بعد مصطفیٰ کمال سمیت رضا ہارون اور ڈاکٹر صغیر احمد کو گرفتار کر لیا گیا تاہم چند گھنٹے کے بعد انھیں رہا کر دیا گیا۔
پی ایس پی کے رہنما آصف حسنین کا کہنا تھا کہ ان کی ریلی پر امن تھی اگر کارکن مشتعل ہو جاتے تو شہر بھر میں ہنگامے ہوجاتے، وہ عوام کے مطالبات منوانے جا رہے تھے حکومت گرانے کے لیے نہیں۔
پی ایس پی کے رہنما اشفاق منگی کا کہنا تھا کہ وہ ریڈ زون میں داخل نہیں ہو رہے تھے بلکہ مذاکرات کر رہے تھے لیکن پر امن لوگوں پر تشدد کر کے جمہوریت کا جنازہ نکالا گیا۔
ادھر صوبائی وزیر امداد علی پتافی کا کہنا ہے کہ پیپلز پارٹی کے رہنماؤں نے پی ایس پی کی قیادت سے مذاکرات کیے مگر مظاہرین ریڈ زون میں آنے کو بضد تھے۔
ان کا مزید کہنا تھا ‘پاکستان پیپلز پارٹی تشدد کی سیاست پر یقین نہیں رکھتی مگر ریڈ زون میں داخلے کی اجازت نہیں دی جاسکتی اس لیے کسی بھی ناخوشگوار صورت حال کو روکنے کے لیے مظاہرین کو منتشر کیا گیا۔
خیال رہے کہ پی ایس پی کے سربراہ مصطفیٰ کمال نے دیگر جماعتوں کو بھی اس مارچ میں شرکت کی دعوت دی تھی تاہم کسی دوسری جماعت نے اس میں شرکت نہیں کی۔
