اسلام آباد ،لاہور،کراچی، برسلز: پاکستان سمیت دنیا بھر میں آج یوم یکجہتی کشمیر منایا جائیگا ، مختلف ممالک میں ریلیاں نکالی جائیں گی،ملک بھر میں تقریبات ، سیمینارز ، ریلیاں اوراحتجاجی مظاہرے ہوں گے ۔
یومِ یکجہتی کشمیر کے موقع پر بیرون ملک پاکستانی سفارت خانوں میں بھی خصوصی تقاریب منعقد کی جائیں گی۔ ملک بھر میں صبح دس بجے سائرن بجائے جائیں گے اور ایک منٹ کی خاموشی اختیار کی جائے گی جبکہ اسلام آباد، مظفر آباد، گلگت بلتستان سمیت چاروں صوبائی دارالحکومتوں میں یکجہتی واکس، خصوصی پروگرامز کا بھی اہتمام کیا جائے گا۔
اپنے پیغام میں صدر مملکت ڈاکٹر عارف علوی،وزیراعظم محمد شہباز شریف ،آصف علی زرداری ، وزیر خارجہ بلاول بھٹو زرداری ، اسپیکر قومی اسمبلی راجہ پرویز اشرف ، ڈپٹی اسپیکر زاہد اکرم درانی، وزیر اعظم کے مشیر قمر زمان کائرہ نے کہا ہے کہ خطے میں امن و استحکام کے لیے مسئلہ کشمیر کا پائیدار حل ناگزیر ہے ۔
وزیر اطلاعات مریم اورنگزیب نے کہاہے کہ وزیراعظم شہباز شریف آج آزاد جموں و کشمیر قانون ساز اسمبلی کے اجلاس سے خطاب کریں گے۔
جمعیت علماء پاکستان و ملی یکجہتی کونسل کے صدرڈاکٹر صاحبزادہ ابوالخیرمحمد زبیر نے کہا ہے کہ کشمیر پاکستان کی شہ رگ ہے اس کی حفاظت ہماری اولین ذمہ داری ہے۔
