اسلام آباد،راولپنڈی : پاک فوج کے شعبہ تعلقات عامہ(آئی ایس پی آر) نے کہا ہے کہ پاک فوج مادر وطن کے دفاع کیلئے ہر وقت تیار ہے جبکہ سابق آرمی چیف کا پاکستان کیلئے مستقبل کے خطرات پر بیان سیاق و سباق سے ہٹ کر پیش کیا گیا۔
گزشتہ روز جاری بیان میں آئی ایس پی آر نے مزید کہا کہ پاک فوج کی جنگی تیاریوں اور جنگی صلاحیت کے بارے میں میڈیا میں بحث سامنے آئی، یہ مباحثے سابق آرمی چیف کے انٹرویو کے تناظر میں ہوئے، سابق آرمی چیف کا صحافیوں کو آف دی ریکارڈ سیشن میں دیا گیا بیان سیاق و سباق سے ہٹ کر پیش کیا گیا۔
پاک فوج نے ہتھیاروں، سازو سامان اور جنگی وسائل سے بھرپور ہیومن ریسورس کو ہمیشہ تیار رکھا ہے اور تیاریاں جاری رکھیں گے۔ پاک فوج نے ہمیشہ اپنی آپریشنل تیاریوں اور انتہائی جنگی قابلیت پر فخر کیا اور کرتے رہیں گے۔
