اسلام آباد: صدر مملکت ڈاکٹر عارف علوی نے قومی احتساب بیورو (ترمیمی) بل 2023 پارلیمنٹ کو دوبارہ غور کرنے کیلئے واپس بھجوادیا۔
صدر مملکت نے بل آئین کے آرٹیکل 75 ایک بی کے تحت پارلیمان کو واپس بھجوایا۔صدر عارف علوی کی جانب سے بل پر اعتراض میں کہا گیا ہے کہ قومی احتساب آرڈیننس 1999 میں کی گئی ترمیم سپریم کورٹ میں زیر سماعت ہے۔
صدر مملکت نے اعتراض اٹھایا کہ بل میں زیر التوا معاملے کے اثرات پر غور کئے بغیر قومی احتساب آرڈیننس 1999 میں مزید ترامیم پر دوبارہ غور کیا جانا چاہئے جبکہ ان کی جانب سے بل اور وزیراعظم کی ایڈوائس میں اس پہلو کا حوالہ نہیں دیا گیا۔
