حکومت کا آئی ایس آئی میں‌ سویلین بالادستی بڑھانے کا فیصلہ

اسلام آباد(اے این این ) حکمران جماعت مسلم لیگ (ن) نے ملک کے سب سے اہم خفیہ ادارے انٹر سروسز انٹیلی جنس(آئی ایس آئی)میں اعلی عہدوں پر سویلین کے شیئر کو بڑھانے کا فیصلہ کرلیا۔

نجی ٹی وی کے مطابق وزیر اعظم شاہد خاقان عباسی نے وزارت دفاع کی جانب سے بھیجی گئی سمری پر آئی ایس آئی میں سویلین کے سب سے بڑے عہدے ڈائریکٹر جنرل(ڈی جی)کی تعداد کو ایک سے بڑھا کر 4 تک کرنے کی تجویز کی منظوری دیدی۔

آئی ایس آئی میں میں سویلین کا سب سے بڑا عہدہ ڈائریکٹر جنرل کا ہوتا جو 21 گریڈ کے سرکاری افسر جبکہ آرمی کے موجودہ میجر جنرل کے برابر ہوتا ہے۔

قبل ازیں ڈی جی آئی ایس آئی کے عہدے پر  صرف ایک ہی سویلین کو مقرر کیا جاتا تھا تاہم اب یہ تعداد بڑھائی جائے گی۔

اس کے علاوہ وزارتِ دفاع کی سمری میں ڈپٹی ڈائریکٹر جنرلز(ڈی ڈی جیز)کی تعداد بڑھانے کی تجویز دی گئی تھی، تاہم وزیر اعظم نے یہ تعداد 8 سے بڑھا کر 15 کرنے کی منظوری دیدی۔

وزارتِ دفاع کی سمری میں گریڈ 20 پر ایڈیشنل ڈی ڈی جیز کی 7 آسامیاں بنانے کی سفارشات پیش کی گئی تھیں۔وزیر اعظم ہاﺅس سے جاری اعلامیے کے مطابق وزیر اعظم شاہد خاقان عباسی نے وزارتِ دفاع کی سفارشات کا بغور جائزہ لیا اور اسے خوش اسلوبی کے ساتھ منظور کیا‘ تاہم سکیورٹی ایجنسی کے حکام نے اس نئی پیشرفت پر تبصرہ کرنے سے انکار کردیا کیونکہ  آئی ایس آئی وزیر اعظم کے ماتحت کام کرتی ہے لہٰذا ادارے میں نئی آسامیاں بڑھانے کا فیصلہ ملکی سربراہ کا ہے۔

اپنا تبصرہ بھیجیں: