خیبرپختونخوا میں حال ہی میں منعقد ہونے والے ایم ڈی کیٹ کے امتحانات میں شرکت کرنے والے طالب علم نے خودکشی کرلی۔
پشاور کے اسلامیہ کالج میں شعبہ بی ایس زولوجی کے پہلے سال میں زیر تعلیم نوجوان طالب علم مبشر علی کی اچانک طبیعت بگڑی جس پر اُسے اسپتال منتقل کیا گیا۔
اسپتال پہنچنے پر ڈاکٹرز نے اُس کو بچانے کی کوشش کی مگر وہ دوران علاج جانبر نہ ہوسکا۔ انتظامیہ کے مطابق ڈاکٹرز نے معدے کی صفائی بھی کی تھی۔
ذرائع کا کہنا ہے کہ مبشر نے حال ہی میں ایم ڈی کیٹ کے ٹیسٹ میں شرکت کی تھی اور اُسے اپنی ناکامی کا بہت زیادہ خوف تھا۔
کالج انتظامیہ نے بتایا کہ مبشر علی کے دوست نے ہاسٹل کے کمرے میں اُسے تڑپتی ہوئی حالت میں دیکھا تو مطلع کرنے کے بعد وارڈن کے ساتھ اسپتال پہنچایا تھا۔
ڈاکٹرز نے تصدیق کی ہے کہ مبشر علی کی موت زہر خوانی کی وجہ سے ہوئی ہے۔
