ایڈیشنل کمشنرٹو عبد الصمد نظامانی سے کراچی بچاؤ تحریک سوشل میڈیا کمیٹی کی رکن لیلیٰ رضا کی زیر قیادت گجر و اورنگی نالہ متاثرین کمیٹیوں کے وفد نے ملاقات کی۔
وفد نے ایڈیشنل کمشنر ٹو کو نالہ متاثرین کی مسنگ آئی ڈیز اور کرائے کی مد میں رکے ہوئے چیکس جیسے مسائل سے آگاہ کیا، جس پر عبدالصمد نظامانی کا کہنا تھا کہ میونسپل کمشنر کے پاس مسنگ آئی ڈیز اور اپرووڈ آئی ڈیز کی فہرست موجود ہے جیسے ہی وہاں سے موصول ہوتی ہے تو ہم ان پر کام شروع کردیں گے۔
رکے ہوئے چیکس کے ایشو پر ایڈیشنل کمشنر ٹو نے بتایا کہ 340 کے لگ بھگ چیک رکے ہوئے تھے جو ہم نے کلیئر کروادیے ہیں۔ ایک ہفتے کے اندر ان کی فہرست آپ کو فراہم کردی جائے گی اور چیکس کا اجرا شروع کردیا جائے گا۔
ایڈیشنل کمشنر ٹو نے وفد کو متاثرین کے تمام مسائل کے سلسلے میں اپنے بھرپور تعاون کی یقین دہانی کرائی۔
وفد میں لیلیٰ رضا کے علاوہ کنوینر گجرنالہ کور کمیٹی عارف شاہ، سیکریٹری گجرنالہ کور کمیٹی مشتاق اعوان اور رکن اورنگی نالہ کمیٹی سرور شکور شامل تھے۔
