کراچی: وزیر تعلیم سندھ نے کراچی میں نیو سعید آباد ڈگری کالج کے کلرک کو طالبہ کے والد سے تضحیک آمیز رویہ اختیار کرنے پر نوکری سے برطرف کر دیا۔
صوبائی وزیر تعلیم سردار شاہ نے کالج کے کلرک کی جانب سے والد سے شرمناک رویہ اختیار کرنے پرکلرک اور والد کو اپنے دفتر میں طلب کیا جس پر حیدرآباد ریجنل ڈائریکٹر کالجز، ڈگری کالج کی انتظامیہ اور والد صوبائی وزیر کے سامنے پیش ہوئے۔
وزیر تعلیم نے طالبہ کے والد کے ساتھ شرمناک رویہ اختیار کرنے پر کلرک جانب کیریو پر غم و غصے کا اظہار کرتے ہوئے کہا کہ کیا تم خود کو بادشاہ سمجھتے ہو ؟ تمہیں کوئی عہدہ ملا ہے تو اس کی عزت کرو۔
طالبہ کے والد ظفر اللہ میمن نے صوبائی وزیر تعلیم سے انصاف کی اپیل کرتے ہوئے کہا کہ میرے تین بچے اس کالج میں زیر تعلیم ہیں جن میں دو بیٹیاں اور ایک بیٹا شامل ہیں، میں اپنی بڑی بیٹی کے لیے ایم اے کا فارم لینے کالج گیا تھا تاہم کلرک نے فارم دینے سے منع کر دیا۔
اُن کا کہنا تھا کہ جب میں نے کلرک کی شکایت پرنسپل سے کی تو انہوں نے کلرک کی سرزنش کی تاہم کلرک سمیت دیگر اسٹاف نے اپنی بے عزتی محسوس کرتے ہوئے مجھے سنگین نتائج کی دھمکیاں دیں جبکہ میں نے اپنے بچوں کے مستقبل کی خاطر کلرک کے پاؤں پکڑ لیے۔
وزیر تعلیم سندھ سردار شاہ نے ڈگری کالج کے سینئر کلرک جانب کیریو کو طالبہ کے والد سے بدتمیزی کرنے اور شرمناک رویہ اختیار کرنے پر برطرف کیا جب کہ دوسرے کلرک کامران خانزادہ کو معطل کر دیا ہے۔
واضح رہے کہ سوشل میڈیا پر طالبہ کے والد کی ویڈیو وائرل ہوئی تھی جس کے بعد محکمہ تعلیم نے کلرک کی حرکت کا نوٹس لیتے ہوئے اُسے طلب کیا تھا۔
بیٹی کے لیے فارم لینے کے لیے آنے والے باپ کو کلرک نے پیروں میں پڑ کر معافی مانگنے پر مجبور کردیا۔
مٹیاری کے گورنمنٹ کالج کے کلرک نے بیٹی کے لیے فارم لینے کے لیے آنے والے باپ کو پیروں میں پڑ کر معافی مانگنے پر مجبور کیا، وزیرتعلیم نے واقعے کا نوٹس لیتے ہوئے پرنسپل سے وضاحت طلب کرلی اور کلرک کو کراچی آفس پیش ہونے کی ہدایت کردی۔
متاثرہ شہری کا کہنا تھا کہ بیٹی کا ایم اے فائنل کا فارم حاصل کرنے کے بعد مضمون معلوم کرنے پر کالج کلرک طیش میں آگیا اور عملے نے تشدد کا نشانہ بنانے کے ساتھ نازیبا الفاظ بھی استعمال کیے۔
سوشل میڈیا پر وائرل ہونے والی ویڈیو میں دیکھا جاسکتا ہے کہ ایک شخص کالج میں اپنی بیٹی کے داخلے کے لیے کلرک کی منت سماجت کررہا ہے لیکن کلرک کی ہٹ دھرمی ختم نہیں ہورہی باپ کو اپنے قدموں میں گر کر معافی مانگنے پر مجبور کررہا ہے۔
صوبائی وزیر تعلیم سید سردار شاہ کے نوٹس لینے کے بعد ڈائریکٹر کالجز حیدرآباد پروفیسر ڈاکٹر عبدالحمید چنڑ نے نیو سعید آباد گورنمنٹ ڈگری کالج کے سینئر کلرک کو معطل کردیا ہے۔
