کراچی کے علاقے اولڈ سٹی ایریا کے مشہور و معروف بازار میں گزشتہ روز مرچی کا کاروبار کرنے والے محمد سلیم کو نامعلوم افراد نے شہید کیا۔
گزشتہ روز ٹریڈر ایسوسی ایشن نے تاجر کے قتل کی شدید الفاظ میں مذمت کی تھی اور آج احتجاجاً کاروبار بند رکھنے کا اعلان کیا تھا جس پر مکمل عمل درآمد کیا گیا۔
جوڑیا بازار، ڈانڈیا بازار، نیو چالی، لی مارکیٹ، نناکواڑا سمیت کراچی کے تمام بازار کو دکانداروں نے احتجاجا بند کیا اور ساتھی تاجر محمد سلیم کے قاتلوں کی فی الفور گرفتاری کا مطالبہ بھی کیا۔
محمد سلیم “سلیم کارپوریشن” کے مالک تھے اور اُن کا شمار جوڑیا بازار کے مرچ کا کاروبار کرنے والے بڑے تاجروں میں ہوتا تھا۔ گزشتہ روز محمد سلیم نے دکان بند کی تو نامعلوم افراد نے دکان کے سامنے ہی اُن پر فائرنگ کی۔
ذرائع کے مطابق محمد سلیم کو بھتہ نہ دینے پر قتل کیا گیا، اولڈ سٹی ایریا میں جرائم پیشہ افراد اور لیاری گینگ وار کے کارندے ایک بار پھر سرگرم ہوگئے جنہوں نے بھتوں کی وصولی کے لیے تاجروں کو پرچیاں بھی بھیجنا شروع کردیں۔
