اسلام آباد: وفاقی دارالحکومت سے چند روز قبل لاپتہ ہونے والے چینی باشندے کی لاش راوالپنڈی کے علاقے سے مل گئی۔
پولیس حکام نے اس بات کی تصدیق کی ہے کہ لی جنگ نیوگ نامی چینی باشندہ 15 اپریل کو سپر مارکیٹ سے لاپتہ ہوا تھا، اُس کے ساتھی نے گزشتہ روز گمشدگی کی درخواست تھانہ کوہسار میں درج کرائی۔
پولیس کے مطابق چینی باشندہ گزشتہ ہفتے اسلام آباد پہنچا تھا اور دوائی خریدنے کے لیے اپنے گھر سے نکلا مگر واپس نہیں آیا، چینی باشندے کی گمشدگی کی رپورٹ اس کے دوست نے درج کروائی تھی۔ پولیس کے مطابق سپر مارکیٹ سے لاپتہ ہونے والے چینی باشندے کی لاش راولپنڈی کے علاقے اقبال ٹاؤن سے ملی ہے۔
پولیس کا بتانا ہے کہ چینی باشندے کے سر پر چوٹیں تھیں اور لاش نالے سے ملی ہے۔ ڈی آئی جی آپریشنز کے مطابق چینی باشندے کا ذہنی توازن بھی ٹھیک نہیں تھا، حادثاتی موت بھی ہو سکتی ہے۔
دوسری جانب چینی سفارت خانے اور قونصل جنرل نے حکومت سے جواب طلب کرلیا۔
