اسلام آباد: عید الفطر کی آمد سے قبل پاکستانی عوام کو ایک اور مہنگائی بم ملنے والا ہے کیونکہ یکم جون سے پیٹرولیم مصنوعات کی قیمتوں میں 12 روپے فی لیٹر اضافے کا امکان ظاہر کیا جارہا ہے۔
ایکسپریس نیوز سمیت دیگر میڈیا چینلز پر ذرائع سے چلنے والی خبروں کے مطابق عید پر حکومت کی جانب سے عوام کو مہنگائی کا ایک اور تحفہ ملنے والا ہے، اور یکم جون سے پیٹرولیم مصنوعات کی قیمتوں میں 12 روپے فی لیٹر اضافے کا قوی امکان ہے کیونکہ سمری وزارتِ خزانہ کو ارسال کردی گئی۔
پیٹرولیم ڈویژن کے ذرائع نے اس بات کی تصدیق کی کہ یکم جون سے پیٹرول کی قیمت میں ساڑھے 9 روپے فی لیٹر، ہائی سپیڈ ڈیزل کی قیمت میں 11 روپے 50 پیسے، لائٹ ڈیزل آئل کی قیمت میں 7 روپے 85 پیسے اور مٹی کا تیل بھی 12 روپے فی لیٹر مہنگا ہونے کا امکان ہے۔ ذرائع کے مطابق قیمتوں میں اضافے کی سمری 30 مئی کو وزارت خزانہ کو ارسال کی جائے گی جب کہ نئی قیمتوں کا اطلاق وزیر اعظم کی مشاورت سے ہوگا۔
