گیس بحران شدت اختیارکرگیا،سحرو افطارکی تیاری امتحان بن گئی

کراچی: کراچی میں گیس کا بحران شدت اختیارکرگیا،سوئی سدرن گیس کی طرف سے سحروافطارمیں بھی گیس کی لوڈشیڈنگ میں کمی نہیں آئی،سوئی گیس حکام کے ٹیموں کے گیس سپلائی بہتربنانے کے دعوے دھرے کے دھرے رہ گئے۔
کراچی کے مختلف علاقوں صدر،لائنزایرایا،آئی آئی چندریگرروڈ،برنس روڈ،رنچھوڑلائن، عیدگاہ،کھارادر،میٹھادر،پاکستان،چوک،گرومندر،نشترروڈ،لیاری،کورنگی،لانڈھی،کیماڑی، ناظم آباد،گلشن اقبال،اورنگی،فیڈرل بی ایریا،نیو کراچی،بلدیہ ٹاؤن،گارڈن،جونا مارکیٹ،ریلوے کالونی میں گیس نہ ہونیکی وجہ سے خواتین کیلئے سحری بنانا بھی امتحان بن گیا،کہیں گیس پریشرمیں کمی،کہیں گیس غائب ہے۔
ماہ رمضان میں سحروافطارمیں گیس نہ ہونے سے عوام کو شدید مشکلات کا سامنا ہے،سوئی سدرن گیس کمپنی نے رمضان المبارک میں سحرو افطارکی تیاری کے اوقات میں گیس کی فراہمی یقینی بنانیکا اعلان کیا تھا،گیس کی عدم فراہمی سے مختلف علاقوں میں عوام سڑکوں پراحتجاج کرنے پرمجبورہیں۔
شہریوں کا کہنا ہے کہ انکے علاقوں میں گیس کی فراہمی کے اوقات میں بھی گیس کی سپلائی معطل رہتی ہے اگرگیس آتی بھی ہے تو اسکا پریشر نہ ہونے کے برابرہوتا ہے۔
کراچی میں گیس ناپید ہوگئی اورگھریلو صارفین کے چولہے ٹھنڈے ہوگئے،سلنڈربیچنے والوں کی چاندی ہوگئی ہے،ماچس کی تیلیاں جلاجلاکرقوم عاجزآگئی،سوئی گیس دفاترکے ملازمین عوام کی شکایت کا جواب بھی نہیں دے رہے ہیں،گیس کی قلت شہریوں کیلئے کڑا امتحان بن چکی ہے سحروافطارمیں شہری ہوٹلوں سے چائے،کھانا اورروٹیاں لانے پرمجبورہیں۔