کراچی انتظامیہ نے طوفان کے خطرے کے پیش نظر شہریوں کے تحفظ کیلئے عظیم صوفی بزرگ سید عبداللہ شاہ غازی کا مزار آئندہ 2 روز کیلئے بند کرنے کی ہدایت جاری کر دی۔
سمندری طوفان کے خطرے کے باعث شہر یوں میں پائی جانے والی تشویش کے باوجود بدھ کے روز بھی ہزاروں زائرین نے سید عبداللہ شاہ غازی کے مزار پر حاضری دی اور رب العزت کے حضور شہر کراچی کے باسیوں کی حفاطت کیلئے دعائیں کیں، مزار کی فضا دور اور استغفار سے معطر رہیں۔
کمشنر کراچی اقبال میمن بھی شہریوں کی جان و مال کے تحفظ کیلئے دعا کرنے مزار سید عبداللہ شاہ غازی پہنچ گئے جہاں انہوں نے مزار کے منیجر حاجی پنوں خان کے ہمراہ مزار پر حاضری دی انہوں نے مزار پر چادر چڑھائی اور ملک و قوم بالخصوص شہر کراچی کی امان کیلئے دعا کی مزار پر موجود شہریوں نے کمشنر کراچی کو اپنے درمیان پاکر مسرت کا اظہار کیا اور کہا کہ یہ پہلا موقع ہے کمشنر کراچی اس شہر کے تحفظ کیلئے دعا کرنے کیلئے بذات خود ان کے درمیان موجود ہیں۔
کمشنر کراچی شہریوں میں گھل مل گئے انہوں نے شہریوں سے گفتگو کرتے ہوئے کہا ہے کہ کراچی کی انتظامیہ شہریوں کے تحفظ کیلئے اپنے فرائض سے غافل نہیں میری پوری ٹیم ان کے تحفظ کیلئے شب و روز کام کر رہی ہے میرا مزار پر آنے کا مقصد شہریوں کے ساتھ مل کر سید عبداللہ شاہ غازی کے وسیلہ سے رب العزت کے حضور دعا کرنا ہے کہ وہ طوفا ن کی آفت سے اس شہر کو محفوظ رکھے۔
انہوں نے مزار کے منیجر کو ہدایت کہ شہریوں کے تحفظ کیلئے 15/16 جو ن مزار بند رکھیں مزار انتظامیہ نے ضلعی ا نتظامیہ کی ہدایت پر جمعرات ، جمعہ کو مزار زائرین کیلئے بند رکھنے کا اعلان کر دیا ہے۔
