کراچی: پی ایس پی کے چیئرمین مصطفی کمال نے چیئرمین نیب کو چیلنج دیتے ہوئے کہا ہے کہ میرا دامن صاف ہے اگر الزام ثابت ہوجائے تو پھر جیل میں ڈالنے کے بجائے بیچ چوراہے پر پھانسی دے دی جائے۔
نجی ٹی وی سما کو انٹرویو دیتے ہوئے مصطفیٰ کمال کا کہنا تھا کہ اگر مجھ پر ایک روپے کی کرپشن بھی ثابت ہوجائے تو مجھے جیل میں مت ڈالنا بلکہ بیچ چوراہے پر لٹکادینا لیکن اگر کچھ ثابت نہ ہوا تو میری کردار کشی کی قیمت کون ادا کرےگا۔
ذرائع کے مطابق پی ایس پی کے چیئرمین مصطفی کمال پرغیر قانونی زمین کی الاٹمنٹ کا الزام ہے جس پر ان کے خلاف نیب میں ریفرنسز دائر ہیں اور ذرائع کے مطابق بہت جلد گرفتاری متوقع ہے جس کی وجہ سے پی ایس پی کے چیئرمین نہایت پریشانی کا شکار ہیں۔
دوسری جانب ذرائع کو ملنے والی اطلاع کے مطابق نیب نے مصطفیٰ کمال کے وارنٹ گرفتاری بھی جاری کردیے ہیں، جس کی وجہ سے پی ایس پی قیادت پریشانی کا شکار ہے۔
