کراچی: صوبائی وزیر بلدیات اور پیپلزپارٹی کے رہنما سعید غنی نے شہر میں پانی بحران کا ذمہ دار ایم کیو ایم کو قرار دیا۔
ایم کیو ایم کے مظاہرے پر ردعمل دیتے ہوئے سعید غنی کا کہنا تھا کہ واٹر بورڈ کے عہدیدار ایم کیو ایم کے جلسوں میں جاتے ہیں، وہ لوگ واٹر بورڈ سے تنخواہ لے کر بہادرآباد کے لیے کام کرتے ہیں۔
سعید غنی نے کہا کراچی کے پانی کے لیے تمام منصوبے مکمل کریں گے۔
ایک روز قبل سعید غنی کا کہنا تھا کہ صرف کراچی نہیں بلکہ پورے سندھ اور پاکستان میں پانی کی قلت کا سامنا ہے۔
یاد رہے کہ گزشتہ روز ایم کیو ایم نے پریس کلب کے باہر احتجاجی مظاہرہ کیا تھا جس میں سندھ حکومت کے کراچی کے ساتھ برتے جانے والے رویے پر مقررین نے روشنی ڈالتے ہوئے شہریوں کے مسائل حل کرنے کا مطالبہ بھی کیا تھا۔
